Një ngjarje e rëndë ka ndodhur të enjten në Kamenicë, ku një person ka humbur jetën në rrethana ende të paqarta. Sipas informacioneve të Policisë së Kosovës, incidenti ka ndodhur rreth orës 17:46.
Raporti 24-orësh i policisë sqaron se viktima, një shtetas kosovar, dyshohet se ka humbur ndjenjat teksa ishte duke punuar, duke rënë menjëherë në tokë. Pavarësisht përpjekjeve për ta ndihmuar, ai është dërguar në Qendrën Kryesore të Mjekësisë Familjare (QKMF) në Kamenicë.
Mjeku kujdestar në QKMF ka konstatuar vdekjen e tij. Me urdhër të prokurorit, trupi i pajetë është dërguar në Institutin e Mjekësisë Ligjore (IML) për obduksion, me qëllim të zbardhjes së plotë të shkaqeve të vdekjes.
