Kushtetuta e Kaçanikut, e miratuar më 7 shtator 1990, ka qenë dhe mbetet një nga aktet më të rëndësishme në historinë e Kosovës.
Ky dokument ka shërbyer si simbol i vendosmërisë sonë për liri dhe shtetësi të pavarur, duke e përfaqësuar qartë dëshirën dhe guximin e popullit për të ndjekur rrugën e vet.
Sot, në këtë përvjetor historik, ne kemi një detyrë të madhe. E kemi për obligim ta nderojmë këtë trashëgimi duke vazhduar të punojmë për një shtet më të fortë, më të drejtë dhe të integruar plotësisht në familjen evropiane.
Përpjekjet dhe sakrificat e atyre që e ngritën këtë gurthemel nuk duhet të harrohen apo të neglizhohen.Rruga që e kemi kaluar deri në shtetësinë e plotë ka qenë e mbushur me sfida, por është e rëndësishme të kujtojmë se ajo është rezultat i përkushtimit dhe luftës së brezave të tërë.
Sot, duhet të ruajmë dhe të mbrojmë me shumë dashuri atë që kemi fituar me gjak dhe sakrificë. Vetëm përmes përkushtimit tonë mund ta bëjmë Kosovën më të fortë dhe një shembull në arenën ndërkombëtare.
Le të jetë Kushtetuta e Kaçanikut një kujtesë e përhershme se sa larg kemi ardhur dhe sa shumë kemi për të ruajtur dhe ndërtuar për të ardhmen.