Një ngjarje e pazakontë ka tronditur kryeqytetin japonez, Tokio, ku një orë luksoze me vlerë mbi 260,000 euro, e vjedhur nga një dyqan në lagjen e njohur Nakano, iu kthye pronarit me një letër falje. Rasti ka ngjallur kureshtje të madhe dhe ka mbizotëruar në mediat japoneze.
Ngjarja e çuditshme ndodhi kur një individ, i prezantuar si klient, provoi një orë Audemars Piguet me çmim prej 46 milionë jen (rreth 260,000 euro). Në një moment të papritur, ai u largua nga dyqani pa e paguar orën. Vetëm më 1 nëntor, dyqani mori një pako të panjohur që përmbante orën e vjedhur dhe një shënim të shkruar me dorë, ku autori kërkonte falje për veprimin e tij.
Numri serial i orës ka ndihmuar autoritetet të konfirmojnë se bëhej fjalë për sendin e vjedhur. Megjithatë, pronari i dyqanit ka zgjedhur të mos bëjë komente, duke lënë hapësirë për spekulime. Policia e Tokios po vazhdon hetimet intensive për të identifikuar personin përgjegjës për këtë akt të rrallë.
Ky rast ka nxitur debate të shumta në rrjetet sociale dhe mediat, duke ngrënë pyetje mbi motivet e autorit – a ishte ky një akt pendese i sinqertë apo një përpjekje për të shmangur ndjekjen penale? Interesi publik mbetet i lartë, teksa priten zhvillime të mëtejshme rreth këtij misteri.
Ky incident vjen pas një serie vjedhjesh orësh luksoze në Tokio. Në gusht, një rast i ngjashëm raportoi vjedhjen e katër orëve me vlerë mbi 1.13 milion euro nga një dyqan tjetër në të njëjtin qendër tregtare.
