Këngëtarja shqiptare me famë botërore, Dua Lipa, ka ndarë së fundmi me fansat e saj në Instagram momente të rralla nga jeta private dhe profesionale, duke zbuluar detaje emocionuese rreth martesës së saj me aktorin britanik Callum Turner dhe planet për të ardhmen.
Artistja 31-vjeçare, e cila së fundmi u shfaq elegante në një ndeshje bejsbolli në New York krah bashkëshortit të saj 36-vjeçar, Callum Turner, publikoi një seri fotografish që ofruan një pasqyrë të aktiviteteve të saj të javës. Përveç momentit të veçantë në Yankee Stadium, ku çifti ndoqi ndeshjen mes New York Yankees dhe Tampa Bay Rays, Dua shkëlqeu edhe në një ngjarje elegante me një fustan të zi me shpinë të zbuluar.
Në mesin e fotove të ndara, Dua përfshiu edhe imazhe nga kabina fotografike gjatë promovimit të markës së saj të kujdesit për lëkurën, DUA™, krijuar në bashkëpunim me Augustinus Bader Science. Kjo linjë kozmetike, e bazuar në kërkim shkencor, ka rezultuar një sukses i madh në treg. Një tjetër imazh nga studioja e regjistrimit lë të kuptohet se artistja është duke punuar intensivisht për projekte të reja muzikore.
“Shtatë ditë, pak a shumë, dhe ndeshja ime e parë e bejsbollit!”, shkroi Dua krahas postimit, duke shprehur emocionet e saj.
Më tej, Dua Lipa ka rrëfyer detaje nga ceremonia e saj martesore, të cilën e ka përshkruar si një nga përvojat më të bukura të jetës. Pas një ceremonie civile në Londër, çifti organizoi një festë madhështore në Itali. Dua zbuloi se gjatë ditës së tyre speciale, ata vendosën të ndiqnin vetëm dy këshilla: ta përjetonin ditën si të ftuar dhe të kërkonin vazhdimisht njëri-tjetrin mes njerëzve, duke mos e humbur kurrë nga sytë.
“Dita jonë e martesës ishte magjike. Morëm shumë këshilla, por vendosëm të ndiqnim vetëm dy prej tyre: ta përjetonim ditën sikur të ishim edhe ne të ftuar dhe ta kërkonim vazhdimisht njëri-tjetrin mes njerëzve, pa e humbur kurrë nga sytë njëri-tjetrin”, ka treguar këngëtarja.
Ajo foli gjithashtu për harmoninë mes karrierës së ngarkuar dhe jetës personale, duke theksuar mbështetjen e palëkundur të Callum. “Jam shumë e mirë në gjetjen e një ekuilibri mes punës, pasioneve dhe familjes. Nuk i kam lënë kurrë mënjanë ambiciet e mia dhe jam me fat që kam pranë dikë që e do punën po aq sa unë”, u shpreh Dua.
Duke përshkruar lidhjen e tyre, ajo shtoi: “Për mua, ai është familja ime. Kemi një mënyrë shumë të veçantë komunikimi krijues. Kur marrim vendime së bashku, është sikur të kemi të njëjtin tru, sepse ndjekim të njëjtat instinkte”.
Lumturia personale e Duas duket se po ndikon pozitivisht edhe në drejtimin artistik të saj, duke premtuar materiale të reja që pasqyrojnë këtë fazë të re në jetën e saj.
