Organizata e Veteranëve të Luftës së UÇK-së ka bërë thirrje për një protestë masive më 5 tetor, duke filluar nga ora 12:00, para Kuvendit të Kosovës, për të shprehur pakënaqësinë ndaj situatës aktuale politike.
Arsyeja e këtij organizimi është dështimi për të arritur një marrëveshje politike që do të mundësonte votimin e menjëhershëm të ndryshimeve në Ligjin për Gjykatën Speciale. Veteranët e UÇK-së dhe qytetarët e Kosovës janë të shqetësuar për lojërat politike që po zhvillohen nga Albin Kurti, duke e bërë këtë çështje të ndjeshme edhe më të komplikuar.
Postimi i organizatës thekson se durimi i veteranëve dhe qytetarëve po arrin në fund, duke kërkuar veprime të menjëhershme nga pushteti. Nëse deri nesër nuk arrihet një marrëveshje, ata paralajmërojnë përshkallëzim të veprimeve të tyre.
Pas dështimit për të arritur një marrëveshje politike, veteranët e UÇK-së ndihen të detyruar të veprojnë. Kategoritë e dala nga lufta janë thellësisht të indinjuara me qasjen e z.Kurt, i cili po bën kalkulime politike me ndjenjat dhe sakrificat e qytetarëve të Kosovës.
Afati për arritjen e një marrëveshjeje është vetëm deri nesër, e diel, dhe nëse nuk ka përparim, ata do të përshkallëzojnë veprimet e tyre nga e hëna.
Ky pushtet, në vend që të dëgjojë zërin e qytetarëve dhe të adresojë këtë çështje me seriozitet, po vazhdon të vonojë dhe të abuzojë politikisht me një çështje që prek drejtpërdrejt mijëra familje.
Durimi i veteranëve dhe qytetarëve të Kosovës është shteruar. Të hënën, në ora 12:00, ju ftojmë të gjithëve të mblidhemi para Kuvendit të Kosovës për të kërkuar drejtësi.
