Prishtinë – Albulena Haxhiu, në cilësinë e ushtrueses së detyrës së presidentes së Kosovës, ka zyrtarizuar sot emërimin e Albin Kurtit si mandatar për formimin e Qeverisë së re të Republikës së Kosovës.
Ky vendim, sipas njoftimit zyrtar të zyrës së presidentes, është marrë në përputhje të plotë me dispozitat Kushtetuese të Kosovës dhe pas propozimit formal të Lëvizjes Vetëvendosje, parti e cila doli fituese në zgjedhjet e fundit.
“Në përputhje me Kushtetutën e Republikës së Kosovës dhe pas propozimit të Lëvizjes VETËVENDOSJE!, kam caktuar z. Albin Kurti mandatar për formimin e Qeverisë së Republikës së Kosovës”, thuhet në deklaratën e Haxhiut.
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
Ushtruesja e detyrës së presidentes i ka uruar Kurtit suksese në përballimin e sfidave dhe në ushtrimin e përgjegjësive që vijnë nga besimi i shprehur nga qytetarët e Kosovës. Ajo shprehu shpresën që procesi i formimit të Qeverisë të finalizohet sa më shpejt, në mënyrë që institucionet e reja të fillojnë punën në shërbim të vendit.
“Z. Kurtit i uroj sukses në ushtrimin e përgjegjësive që burojnë nga besimi i qytetarëve, si dhe në formimin sa më të shpejtë të Qeverisë, në shërbim të Republikës së Kosovës dhe qytetarëve të saj”, theksoi Haxhiu.
Pas këtij emërimi, Albin Kurti tani pritet të fillojë konsultimet dhe procedurat e nevojshme për hartimin e programit qeverisës dhe përbërjes së kabinetit të ri, të cilin do ta paraqesë më pas për votim në Kuvendin e Kosovës.
