Pas një dite të tensionuar në Kuvendin e Kosovës, Kryeministri në detyrë, Albin Kurti, ka mbajtur një mbledhje online me kabinetin e tij të mërkurën mbrëma. Zyra e Kryeministrit ka njoftuar për vendimet strategjike të marra gjatë kësaj seance, duke përfshirë miratimin e qiradhënies së parcelave në Zonën Kadastrale Cërnillë, Ferizaj, për shfrytëzimin e gurit gëlqeror deri në vitin 2033. Ky vendim, i kërkuar nga Ministria e Bujqësisë, Pylltarisë dhe Zhvillimit Rural, synon të mundësojë nxjerrjen dhe shfrytëzimin e këtij resursi natyror.
Gjithashtu, Qeveria në detyrë ka miratuar emërimin e komisioneve të pranimit për disa pozita të larta drejtuese në agjenci dhe ministri të ndryshme. Këto emërime përfshijnë komisione për pozitën e Drejtorit Ekzekutiv në Agjencinë Qendrore të Prokurimit, Thesar, Agjencinë Kosovare për Standardizim, Agjencinë për Pronësi Industriale, Agjencinë për Siguri Kibernetike, Agjencinë për Mbrojtjen e Mjedisit, Agjencinë për Inovacion dhe Përkrahje të Ndërmarrjeve, Agjencinë Antidoping, Agjencinë e Sportit, Agjencinë për Zhvillimin e Rinisë, Agjencinë Shtetërore të Arkivave dhe Agjencinë për Ndihmë Juridike Falas. Po ashtu, janë miratuar komisione për Kryeinspektor në Inspektoratin e Tregut, Inspektor në Inspektoratin për Trashëgimi Kulturore, Zëvendësdrejtor i Përgjithshëm në Agjencinë Shtetërore të Arkivave, Sekretar i Përgjithshëm në Ministrinë e Shëndetësisë, Drejtor Ekzekutiv në Inspektoratin e Ministrisë së Drejtësisë, si dhe Drejtor i Përgjithshëm në Agjencinë për Administrimin e Pasurisë së Sekuestruar ose të Konfiskuar.
Në kuadër të vendimeve të tjera, qeveria ka miratuar shqyrtimin e mëtejshëm të kërkesave për shpronësim për interes publik. Këto përfshijnë pronat ish-shoqërore të Kombinatit Industrial Bujqësor ‘’Mladost’’ në Shtime, të cilat preken nga projekti “Ndërtimi i Zonës Ekonomike për Mërgimtarët”, si dhe pronat e nevojshme për ndërtimin e “Ndërtesës Administrative” për Ministrinë e Punëve të Brendshme në Prishtinë. Aprovimi i listës së anëtarëve potencialë të Komisionit të pranimit për Ministrinë e Punëve të Brendshme dhe agjencitë e saj, si dhe vendimi për themelimin e Komisionit Kombëtar janë gjithashtu pjesë e agjendës së miratuar.
