Një takim tre-orësh mes kryeministrit në detyrë, Albin Kurti, dhe kryetarit të Lidhjes Demokratike të Kosovës (LDK), Lumir Abdixhiku, u zhvillua të martën me qëllim arritjen e një marrëveshjeje politike, por përfundoi pa një rezultat përfundimtar. Pavarësisht se takimi u përshkrua si konstruktiv, nuk u arrit ndonjë marrëveshje politike mes dy liderëve.
Albin Kurti deklaroi pas takimit se bisedimet u zhvilluan në një frymë konstruktive, duke shtuar se u diskutuan çështje aktuale politike, situata institucionale dhe sfidat e ardhshme. “Ndajmë shumë brenga, por njëkohësisht ka edhe shumë vullnet e zell për të punuar bashkë në të ardhmen”, tha Kurti, duke theksuar nevojën për takime të rregullta mes partive politike për gjetjen e zgjidhjeve.
Megjithatë, Kurti konfirmoi mungesën e një marrëveshjeje politike me LDK-në, duke theksuar se “lajm do të ishte po të kishim marrëveshje”. Ai shtoi se nevojitet një marrëveshje që respekton rezultatin zgjedhor dhe siguron stabilitet institucional. Kryeministri në detyrë paralajmëroi mundësinë e zgjedhjeve të reja në mungesë të një marrëveshjeje, ndonëse e cilësoi këtë skenar si të padëshirueshëm. Lidhur me zgjedhjen e presidentit, Kurti bëri të ditur se nuk janë diskutuar emra konkretë, por synohet një kandidat gjithëpërfshirës dhe jashtë polemikave partiake.
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
Nga ana tjetër, Lumir Abdixhiku nga LDK vlerësoi takimin si të mbarë dhe konfirmoi gatishmërinë e partisë së tij për vazhdimin e diskutimeve. Ai theksoi se LDK hyri në bisedime me vullnet të mirë, duke respektuar rezultatin zgjedhor dhe me qëllimin për të shmangur zgjedhjet e reja. “Morëm pjesë në takimin e dytë pas 7 qershorit me vullnet të mirë, respektim të rezultatit zgjedhor dhe gatishmërinë si LDK për të shmangur zgjedhjet e reja”, deklaroi Abdixhiku.
Abdixhiku sqaroi se LDK nuk ka “apetit” për pozitën e kryetarit të Kuvendit, pasi sipas tij, kjo është një figurë ceremoniale që duhet t’i takojë partisë së parë, në përputhje me Kushtetutën. Ai shtoi se nëse deri më 6 gusht nuk arrihet një marrëveshje, procesi i konstituimit të Kuvendit duhet të vazhdojë. LDK mbetet e përkushtuar ndaj parimeve të saj, duke kërkuar një marrëveshje gjithëpërfshirëse që do të siguronte balancë institucionale dhe demokratike.
