Ish-finalisti i edicionit të katërt të Big Brother VIP Kosova, Ludo Lee, ka folur për mundësinë e një rikthimi në formatin e njohur të reality show-t. Gjatë një interviste për emisionin “Koment për Koment” të Prive, ai u përball me komentet e ndjekësve, përfshirë atë ku një mbështetës shprehte bindjen se ai e meritonte fitoren dhe duhet të rikthehej në shtëpi.
Ludo Lee konfirmoi bindjen e tij se triumfi i takonte, duke theksuar kontributin e tij të plotë brenda lojës. “E kam merituar plotësisht, sepse si produkt kam dhënë shumë vlera dhe plotësisht e kam merituar si në pjesën e nominimeve, ashtu edhe në lojë,” deklaroi ai.
Lidhur me një rikthim të mundshëm, Ludo Lee e cilësoi veten si një personazh televiziv të fortë, i cili ka lënë mbresë te publiku. Ai sugjeroi se ndërsa figura e tij mund të jetë më pak e pranishme në Kosovë momentalisht, Shqipëria mbetet një treg ku ai shihet si një opsion interesant. “Kam qenë produkt shumë i fortë. Besoj që publiku ka qejf me parë Big Brother ‘Ludo Lee 2’. Në Kosovë u konsumua, por në Shqipëri ndoshta po,” u shpreh ai, duke lënë të kuptohet se një ofertë për Big Brother VIP Albania do të ishte e mirëpritur.
