Në Prishtinë është hapur ekspozita “Sy më sy | Eye to Eye”, e cila sjell përmes artit, fotografisë dhe dokumentimit personal rrëfimet e të mbijetuarve të dhunës seksuale gjatë luftës në Kosovë.
Ekspozita u organizua me rastin e Ditës Ndërkombëtare për Eliminimin e Dhunës Seksuale në Konflikt dhe është realizuar nga Qendra Kosovare për Rehabilitimin e të Mbijetuarve të Torturës (QKRMT), në bashkëpunim me organizatën Pro Peace Kosovo. Qëllimi i saj është ruajtja e kujtesës, luftimi i stigmës dhe forcimi i vetëdijes për drejtësi dhe mbështetje ndaj të mbijetuarve.
Në hapjen e ekspozitës morën pjesë përfaqësues të institucioneve vendore dhe ndërkombëtare, të cilët vlerësuan rëndësinë e trajtimit të kësaj teme dhe mbështetjen e vazhdueshme për të mbijetuarit.
Ambasadori i Mbretërisë së Bashkuar, Jonadeklaroin Hargreaves, theksoi se trauma nuk ka afat dhe se të mbijetuarit duhet të kenë qasje në shërbime dhe drejtësi pa barriera kohore, duke vlerësuar përpjekjet e Kosovës si shembull në trajtimin e kësaj çështjeje.
Ndërsa ambasadori gjerman Rainer Rudolph vlerësoi ekspozitën si një dëshmi të fuqishme të historive personale, duke theksuar se ndarja e rrëfimeve ndihmon në uljen e stigmës dhe në forcimin e kujtesës shoqërore.
Drejtoresha e QKRMT-së, Feride Rushiti, deklaroi se përmes syve të ekspozuar shfaqet dhimbja, frika, guximi dhe shpresa e të mbijetuarve, duke e cilësuar ekspozitën si një ftesë për dialog dhe reflektim shoqëror.
Në aktivitet u prezantuan edhe mesazhe nga familjarë të të mbijetuarve, të cilët kërkuan më shumë hapësirë për shërim, njohje dhe trajtim dinjitoz, duke theksuar rëndësinë e thyerjes së heshtjes dhe stigmatizimit.
Ekspozita pritet të vazhdojë të jetë e hapur për publikun si një kujtesë e gjallë për historinë dhe si një thirrje për drejtësi dhe solidaritet.
Prishtina Post – lajme të shpejta dhe të sakta.
