Pas publikimit të pamjeve filmike nga incidenti në shtëpinë muzikore “ONIMA”, ku artisti Gjesti shihet duke hyrë me armë dhe duke shkatërruar sende në një zyrë, ka ardhur edhe reagimi i tij. Gjesti, përmes një deklarate të bërë publike në profilin e tij zyrtar, ka akuzuar kompaninë për montim të qëllimshëm të videos, duke theksuar se pamjet e publikuara janë të prera dhe nuk e paraqesin tërë realitetin e ngjarjes.
Artisti ka shpjeguar se shkak i konfliktit kanë qenë çështjet financiare, ku ai pretendon se kompania i ka vjedhur fitimet dhe ka falsifikuar nënshkrimin e tij. Gjesti ka ngritur pikëpyetje mbi faktin se pse nuk është publikuar pjesa e videos ku, sipas tij, zyrtarët e kompanisë i kanë drejtuar armë për herë të parë.
Megjithatë, Gjesti ka pranuar përgjegjësinë për veprimet e tij dhe ka deklaruar se do të përballet me pasojat ligjore. Deri në momentin e publikimit të këtij lajmi, kompania “ONIMA” nuk ka ofruar asnjë reagim zyrtar lidhur me pamjet e reja dhe ngjarjen e ndodhur në zyrat e tyre.
